近排大家都相當關注到底現任嘅美國總統特朗普可唔可以成功連任，喺呢項有231年歷史嘅選舉入面，曾經有一位總統相當犀利，佢曾經做過4次美國總統，阿史所講嘅正正就係羅斯福。

富蘭克林·德拉諾·羅斯福係美國歷史上唯一連選連任4屆嘅總統，亦都係史上唯一一個可以連任超過兩次嘅美國總統。羅斯福係第32任美國總統，亦都係荷蘭裔美國人，出身喺紐約市羅斯福家族嘅佢，1910年代開展佢嘅從政生涯，當選紐約州參議員，順利入到參議院之後成為民主黨黨內之星；但去到1913年佢就被任命做海軍助理部長，喺呢段時間學識唔少政府部門嘅談判同埋財政管理。去到1920年代，佢就不幸因為疾病導致腰部以下完全永久性癱瘓，去到後來競選公職，都係憑住金屬支柱同埋拐杖勉強支撐住自己，而當時好多美國人都唔知呢件事。

咁佢嘅任期到底由幾時開始？答案就係由1933年就任以來就做足12年零40天總統職位，佢係美國1920至1930年代經濟危機同埋二戰入面嘅一個核心人物，喺經濟大蕭條期間推行過唔少失業救濟與復甦經濟措施，亦都對塑造戰後世界秩序發揮關鍵作用，直到逝世前一刻佢都係喺做緊美國總統。就算去到2005年，佢仍然被選為頭十位「最偉大的美國人」。

原圖嚟自網絡