金庸先生嘅夢中情人係夏夢？

如果史友們有返咁上下年紀，應該都會聽過呢位著名嘅香港女星夏夢，佢活躍喺1950年代到1960年代，從影17年，拍攝影片約40部。最初佢係出演長城製片公司嘅作品好似《禁婚記》、《娘惹》、《都會交響曲》、《姊妹曲》等影片而慢慢成為國語電影公司台柱，後來仲同石慧、陳思思並稱「長城三公主」。提起夏夢，相信唔少史友都會諗起一個人，呢個人就係金庸先生。

夏夢歷年嚟都被指係金庸先生嘅夢中情人，金庸仲曾經為佢而以筆名「林歡」加盟香港長城電影製片公司擔任編劇，唔少人直頭覺得金庸筆下嘅黃蓉、小龍女、王語嫣等大美人都有夏夢嘅影子，只係夏夢21歲就嫁咗畀商人林葆誠。

咁金庸先生有冇認過呢段情呢？金庸早年就講過，自己「追過一名女孩子，她絕對不愛我，我非愛她不可」，而後來佢好朋友倪匡就指佢「好像追過夏夢」。後來查良鏞創辦《明報》，關於夏夢嘅消息經常都有報道，甚至仲有個專欄叫做「夏夢遊記」。金庸就曾經形容，「西施怎樣美麗，誰也沒見過，我想她應該像夏夢才名不虛傳」，仲講到明「生活中的夏夢真美，其艷光照得我為之目眩；銀幕上的夏夢更美，明星的風采觀之就使我加快心跳，魂兒為之勾去」，認真痴情！