早幾日介紹唐伯虎點秋香嘅時候,阿史就諗返起星爺唔少經典嘅電影,其中一幕就當然係《鹿鼎記》入面韋小寶加入天地會嘅一幕,睇咁多次都會咁好笑。講開又講,到底天地會呢個組織又係點樣出現呢?原來當中又有段故!

相傳喺康熙年間,由此西魯番人作亂入侵甘肅,清兵唔夠打失敗而回,最後康熙就皇榜佈告天下,講明只要打敗佢哋就可以封為萬代公侯。少林寺長老眼見打仗生靈塗炭,於是就揭皇榜帶同百幾位僧人前往退敵。結果就當然係成功退敵,並且最後唔接受任何官職返到少林寺繼續修行啦。

但問題嚟喇,呢班僧人咁好打,可以打敗西魯國,換言之實力更加喺清廷之上,當時康熙聽咗其中一位大臣意見,決定火燒少除後患。火一燒起,少林寺就只係得18個僧人走到出嚟,跟住畀清軍圍攻之下,就得返5個人。呢5個僧人後來被稱為南少林五祖,佢哋分別係蔡德忠、方大洪、馬超興、胡德帝、李式開。佢哋走到南方,發現到一個大香爐,底部寫住「反清復明」四個大字,並且認為呢個係天意,於是就拜萬和尚為師,組織天地會,進行「反清復明」嘅活動。

呢個故事當中當然有唔少神秘嘅色彩,幾成真幾成假就真係冇人知喇!

原圖嚟自網絡