八拜之交係指邊八拜？

喺古時候，形容人同人之間關係良好，甚至去到同異姓同輩人結義為兄弟或姐妹，都會用到「八拜之交」呢個詞，雖然八拜亦都係指古代世交子弟謁見長輩所做嘅一啲禮節，但喺呢個成語入面，「八拜」真係各有所指啊！

所謂嘅「八拜之交」，喺歷史上真係有八個唔同故事、八種交情，亦都有各自嘅名稱，就好似管仲鮑叔牙嘅管鮑之交、俞伯牙鍾子期嘅知音之交、廉頗藺相如嘅刎頸之交、羊角哀左伯桃嘅捨命之交、陳重雷義嘅膠漆之交、元伯巨卿嘅雞黍之交、孔融禰衡嘅忘年之交同埋劉備、張飛和關羽嘅生死之交，是為八拜之交。

呢八個歷史故事入面，都係反映咗主人公同生死、共患難、重情義嘅高尚情操，被視為係朋友之間應該學習嘅典範，係友情最高嘅境界。