早排阿史就同大家介紹咗方太方任利莎點樣入行上電視教烹飪,而唔講真係未必知,方太喺加入麗的電視《下午茶》做主持之前,係曾經喺超群家政中心任教,而佢主持嘅《下午茶》節目亦都係代替李曾超群,唔知大家又記唔記得邊個係李曾超群呢?

李曾超群喺烹飪都有返咁上下名聲,佢係西餅連鎖集團超群餅店創辦人,當年仲有唔少人叫佢做「西餅皇后」,佢一生都真係大起大落!曾超群出生喺上海嘅大富之家,受到上海西餅店林立氛圍感染,自細佢就對西餅有住濃厚嘅興趣。佢後生果時先後喺上海同埋美國讀過心理學,1950年返到香港就結埋婚,先喺福利機構義務教烹飪,之後仲開設埋自己嘅「超群烹飪研究學院」,教授自己喺美國學到嘅製餅方法。

如是者做咗一段時間,佢喺1966年就喺太子道開設咗第一間超群餅店,亦都係全港第一間西餅店,以鮮奶油蛋糕最為出名。當時超群餅店大受歡迎,亦都擴展得好快,全盛時期有過60間分店,去到80年代仲去到台灣投入當地嘅喜餅市場,業務更發展至美加。之不過,由於信錯下屬,再加上1997年亞洲金融風暴,超羣餅店於1998年5月7日被逼清盤,而李曾超羣亦欠落4,000萬債務。

面對住呢個打擊,佢冇就咁被打沉,反而好積極咁以10年時間還清債務,呢段人生經歷真係大起大落。

原圖嚟自網絡