今日係11月11日，喺唔少西方國家嚟講，呢一日都仲係和平紀念日，最初係為咗紀念喺第一次世界大戰入面犧牲咗嘅軍人同埋平民而設立嘅節日。呢個節日由由英王喬治五世喺1919年11月7日創立，至於點解要揀11月11日，就係因為喺一戰嘅1918年11月11日上午11點，德國就係喺呢個時間喺康邊停戰協定簽字，象徵第一次世界大戰結束。由於後來二戰同樣都係死傷慘重，和平紀念日亦都引伸埋紀念二戰犧牲嘅軍民。

喺呢一個咁特別嘅日子，接照傳統大家都會佩戴一種紅色虞美人花，佢哋認為呢種花可以代表和平。喺香港中環亦都設立咗一塊和平紀念碑，紀念陣亡將士，上面刻有一戰年份(1914-1918)同埋The Glorious Dead 字眼，去到二戰之後就加上二戰年份(1939-1945)同埋「英魂不朽，浩氣長存」。時至今日，仲有唔少團體喺相關嘅紀念日都會去到碑前舉行活動悼念死難軍民。

原圖嚟自網絡