呢排都同史友們介紹唔少美國總統選舉嘅故事，又有講到美國第一位總統同埋一啲輸咗選民選票但以選舉人團票入主白宮嘅總統，而講到咁多任嘅美國總統，最特別嘅應該都係接下落嚟阿史要介紹嘅呢一位，事關係佢美國歷史上唯一一位在任期間辭職下台嘅總統。

佢就係尼克遜，佢早年係喺法學院畢業，從事法律工作，後來去到二戰爆發佢就期間應徵加入美國海軍服役，戰爭結束後就擔任加利福尼亞州聯邦眾議員同埋聯邦參議員，1952年美國總統選舉中就成為德懷特·艾森豪競選搭擋，喺1953至1961年擔任美國副總統，係當時全國都知名嘅政治家。

尼克遜其實唔止一次參選過美國總統，1960年果次就以微弱差距輸咗畀甘迺迪。去到1969年，佢終於成功做到第37任美國總統。佢任內做過唔少事，就好似令美軍撤軍越南戰爭、訪問中華人民共和國，亦都同蘇聯簽訂反彈道飛彈條約等等，睇到呢度，可能史友們會問，做得好好地點解會辭職嘅？

原來喺1970年代，美國本土就發生咗一單政治醜聞，華盛頓特區水門綜合大廈發現被人侵入，但時任總統尼克遜同埋佢內閣試圖掩蓋事件真相，最後佢失去政治支持、面臨國會彈劾喺1974年8月9日宣布辭職，成為第一位辭職下台嘅美國總統。

原圖嚟自網絡