點解和平紀念日要佩戴虞美人花？

臨近和平紀念日，相信史友們喺網上討論區都會見到一啲外國政要又或者民間組織凡係喺相關嘅紀念活動前後，都會佩戴住一種好特別嘅花，阿史之前都唔知呢種花叫咩名，後來就知道原來係虞美人花！

虞美人花又叫做麗春花、賽牡丹，以古代楚國女性虞姬命名，屬於罌粟科罌粟屬草本植物，原產於亞歐溫帶大陸，喺古代中國大量栽培，依家就已經引種至紐西蘭、澳大利亞同埋北美，咁到底呢種花點解會同紀念活動扯上關係呢？

原來喺一戰1914年7月28日爆發之後，過咗大半年嘅日子，一位叫做麥克雷（John McCraw）嘅加拿大軍醫喺幫戰友主持喪禮之後第二日，就發現墓地上面生咗唔少鮮紅色嘅花，呢種花正正就係虞美人花。見到咁嘅情景，佢就忍唔住寫咗一首《在法蘭德斯戰場》（In Flanders Fields）詩。呢首詩後來喺倫敦雙周刊《Punch》刊登，成為當時戰爭詩嘅代表作，於是詩入面提到嘅虞美人花喺1921年就正式成為悼念為國捐驅將士嘅一種象徵，時至今日仲有英國工場生產以千萬計嘅虞美人紙花。