每當講到五四新文化運動,好大機會會講到民國時期興起勤工儉學,即係中國學生到外國打工同讀書。咁呢個風氣又係點嚟嘅呢?

响民國成立初期,國家仍然處於混亂局面,於是一班有識之士就鼓勵年輕人去法國吸收先進知識,包括科學知識以至文化藝術,令佢哋學成歸來就可以實行「科學救國」、「實業救國」同「教育救國」。汪精衛、李石曾、蔡元培、吳玉章等人於是就發起咗「留法儉學會」喇!而呢種「生活節儉,課餘勤工」嘅勤工儉學思想,除咗令留學生們擴闊視野外,仲係對年輕人一種心智嘅磨鍊。

值得一提嘅係,後嚟俄國發生「十月革命」,於是有批人就去咗蘇聯留學,甚至連蔣介石都被派往蘇聯學習考察。就係咁,法國同蘇聯就成為咗民國時期唔少中國青年留學嘅地方。

如果史友們好記性嘅話,可能會記得阿史介紹過晚清有一股留學日本嘅熱潮,咁點解响民國又會流行赴歐留學呢?原因就係响民國建立以後,中國不斷被日本侵略或壓榨,有啲後生仔就對日本有所反感,繼而想到法國同蘇聯學習科技知識同先進思想。

原圖:網絡