【講開有段故】亞皆老街係用英國商船命名？

繼續同史人們介紹各區嘅一啲特別嘅街名，喺九龍有一條連接住油尖旺同埋九龍城嘅主要道路，呢條叫做亞皆老街。呢條路比較特別嘅地方係，佢並唔係用人名又或者一啲地方名而命名，反而係用19世紀末一艘英國商船命名。

亞皆老街早喺1900年就通車，目前已經係一條可以四線雙程行車嘅道路，由大角咀渡船街開始穿過彌敦道、窩打老道，最後可以通到去九龍城南部舊啟德機場一帶。雖然係1900年就已經通車，但呢條街道嘅命名就去到 1926年2月先開始，當時港府就以19世紀末一艘往來印度與南中國嘅英國商船亞皆老號命名，當時就用到亞皆老Argyle命名，亦即係 Argyll嘅舊有拼寫。

至於點解要用呢艘船呢，據講蘇格蘭西部都有個地方就用到Argyle命名，意思即係指蘇格蘭人與愛爾蘭人嘅邊界，而同樣嘅用法喺馬來西亞、檳城鴨加路(Argyll Road)都一樣有。

原圖嚟自網絡