昔日屯門小漁村——三聖墟

如果喺九龍東想食海鮮嘅話，相信大部分史友都會諗到鯉魚門，咁如果講到想喺屯門食海鮮呢？以前大家都會諗起一個地方，就係三聖墟。

三聖墟以前又叫做青山灣，之所以會改名叫做三聖，都係因為山邊有座三聖廟。如果史友們有去過呢間三聖廟，應該都會發現廟旁邊有塊巨型石碑（即係麒麟崗公園附近），而石碑上面又有寫住「填海之前，岸線所在，以此石為界」，用呢個方式標誌住昔日屯門海岸線。

呢個位於青山灣東南岸，喺井頭村同埋掃管笏村之間嘅地方，現時就係著名海鮮市場三聖墟海鮮市場，而喺以前呢度都的的確確係一個小漁村，以蜑民同埋客籍居民為主。隨住50年代人口激增，山邊海邊嘅寮屋同埋海邊搭建棚屋亦都經常增加，於是近海嘅地方就形成一個墟市，方便呢班居民嘅日常生活。