香港第二長行車隧道——大老山隧道

今日係獅子山隧道通車嘅53周年，咁獅子山隧道嘅歷史都同史友們介紹咗好幾次，咁今次就同史友們講一講其餘連接九龍同埋新界嘅隧道，其中一條就係大老山隧道。

全長3,960米嘅大老山隧道，係全港第二長嘅行車隧道，係一條雙程雙線分隔雙管隧道，連接住新界東沙田小瀝源同埋九龍東黃大仙鑽石山，穿過大老山。

大老山隧道嘅出現無他嘅，都係為咗可以紓緩獅子山隧道車流，近年嘅統計就指，呢條隧道係沙田區4條聯外隧道入面車流第二高嘅隧道。喺1987年，政府就意識到沙田新市鎮嘅出現會令到獅子山隧道行車流量飽和，於是就喺1987年開始為呢個項目招標，並喺1988年7月11日動工興建，以「建造、營運、移交」方式發出大老山隧道30年的專營權。