早幾日就同史友們介紹美國史上唯一一位喺任內辭任美國總統嘅尼克遜，咁當年觸發佢辭職嘅正係1972年嘅水門事件，咁到底呢件係咩事？今次阿史就同大家介紹下啦！

呢單政治醜聞發生喺1972年，當年民主黨全國委員會位於華盛頓特區水門綜合大廈喺6月17日嘅凌晨，有住客發現地下車庫通往大廈嘅門鎖兩次遭人以膠布貼住，咁當時其實係有報過警，亦都有便衣警員捉到五個潛入總部安裝竊聽器同埋拍攝文件嘅疑犯。經過聯邦調查局進一步調查之後，就發現原來呢班人嘅活動資金係嚟自時任總統尼克遜嘅一個籌款組織，尼克遜政府當時曾經動用中情局阻止FBI對資金來源進行調查，但當然係失敗咗啦。

隨住媒體繼續跟進，案件去到1973年，醜聞全面揭開。所有證據都指向白宮幕僚，懷疑係有白宮嘅高層暗中計劃呢件事，當時有被調查到嘅白宮幕僚就主動交代，原來尼克森總統上任後早就已經喺白宮入面裝咗唔少錄音系統，大家所講嘅對話都已經被錄低晒。呢個消息一流出相當震撼，而喺呢啲錄音入面亦都有發現尼克遜曾經明示同埋暗示過要掩蓋自己上任前後做過嘅一啲唔合法嘅行動。

事件喺美國社會引起熱烈討論，亦都經過一系列司法訴訟，尼克遜最終就交出晒所有錄音，由於可能會面對國會眾議院彈劾總統動議、甚至會被定罪，佢最後就喺1974年8月9日正式宣布辭去美國總統職務，而佢一切刑責就被下任總統福特赦免。

原圖嚟自網絡