呢幾日阿史就同大家介紹咗清末民企先賢張謇同埋佢一手造就嘅早期中國民族資本主義工業基地南通,咁就有史友想阿史介紹多啲關於南通嘅歷史,咁就當然冇問題啦!

被稱為「中國近代第一城」嘅南通真係人傑地靈,據考古實證呢個地方早喺5,000幾年前就已經有先民居住,去到後周顯德五年就築城定名通州,後來亦都曾經喺宋朝改名叫過崇州,直至辛亥革命之後先至叫返做南通縣。

咁「北上海」南通嘅位置到底又喺邊度呢?南通就係位於華東地區、江蘇嘅東南部,亦都係揚子江城市群嘅重要部分,甚至仲係上海大都市圈嘅北翼門戶城市。由於南通嘅位置既有海岸、亦都係重要嘅水道,所以直頭有句「據江海之會、扼南北之喉」嚟形容南通嘅地理位置。

南通喺張謇發展之下早喺20世紀初期就形成咗唐閘鎮工業區,天生港同埋發電廠亦都係果陣時建立出嚟,天生港仲曾經成為主要長江港口;時至今日,呢個地方經濟發展水平仲係好高,甚至仲係中國長江以北地區最為發達地級市,難怪國家主席都要去睇一睇。

原圖嚟自網絡