抗日時期有個「一碗飯運動」？

喺1937年七七盧溝橋事變後，中日戰爭全面爆發，亦都令到國內有唔少難民，一日三餐都無以為繼。於是喺1938年當時嘅孫中山夫人宋慶齡就喺香港組織咗一個「保衛中國同盟」會，既為抗日籌集資金，亦都喺1941年幫手推動咗一個好重要嘅活動救助平民，而呢個正係「一碗飯運動」。

「一碗飯運動」最早出現嘅地方並唔係喺香港，而喺係美國舊金山醫藥援華會，當地嘅華僑眼見中國陷入戰爭同埋軍民嘅慘況，都紛紛倡議捐一碗飯嘅錢畀中國軍民。眼見呢個活動喺國外相當成功，身處香港嘅宋慶齡亦都籌辦一個「一碗飯運動委員會」，通過發售一萬張2蚊嘅代用劵希望可以為軍民提供一餐飽飯，而呢筆資金嘅目的就係想支援中國工業合作社籌辦工廠，以工代賑為救濟華北地區嘅戰爭難民。

於是喺同年5月，宋慶齡就以名譽主席身份，聯同香港立法局華人首席議員羅文錦律師、醫務總監司徒永覺夫人克拉克發起呢個運動，得到各界響應，當時靈頓街麗山餐室老板溫梓明率先捐出500碗飯，幾日之內就有十幾間餐廳參加活動，一共捐咗5,000幾碗「救國飯」，最後籌到25,000港元捐畀中國工業合作協會。