全港最寬行車道路——長青公路

繼續同史友們介紹一啲香港重要嘅基建設施，上次就同大家介紹咗香港第二長嘅行車隧道大老山隧道，而今次就同大家講下全港最寬嘅行車道路，亦即係長青公路。

呢條首段喺1997年5月建成嘅公路，現時就係3號幹線同埋8號幹線嘅一部分，亦都係當年香港機場核心計劃嘅道路工程之一；至於呢條公路嘅延長段就係喺2009年12月先建成。長青公路嘅出現就係為咗連接住長青隧道青衣西入口去到青衣西北交匯處，亦都係青衣全島主要幹道之一。呢條公路雖然係全港最寬，但係長度就只係得1公里左右，係成條3號幹線入面最短嘅一段。

咁到底呢條公路有幾寬呢？如果計到最盡係一共有15條行車線！可能有史友會問，要咁多條行車線嚟做乜啊？原來由青沙公路昂船洲至青衣呢一段路中段係會匯合到長青公路，於是長青公路南行方向就會有7條行車線，而北行就會有6條到8條行車線，所以計埋會有13到15條行車線，認真壯觀。