香港唯一位於邊境禁區嘅公共屋邨——沙頭角邨

尋日阿史就同史友們介紹到有紀錄以嚟最大規模嘅公共屋邨慈雲山邨，咁但係自從香港房屋委員會將慈雲山邨分拆成慈安邨、慈樂邨、慈愛邨、慈正邨及慈民邨5個較細嘅屋邨，全港最大規模嘅公共屋邨又變咗做邊個呢？答案就係沙頭角邨喇！

沙頭角邨嘅特色唔單止係規模大，更加重要嘅係佢係全港唯一一個位於邊境禁區嘅公共屋邨。位於新界北區沙頭角墟內，係香港最北面嘅一個公共屋邨，早喺1988年沙頭角管制站擴建之後，鹽寮下棚屋區嘅居民受到清拆影響，房屋協會就開始建設沙頭角邨安置呢班居民。

作為第二個「郊區公共房屋」，呢條沙頭角邨一共分咗5期建成52座大廈，當中唔少嘅大廈都係以T字型及L字型設計，當中嘅大廈嘅外貌都有別於一般嘅公屋，用上橙色斜面瓦頂，素色灰泥修飾牆身，更加似係鄉村式房屋風格。雖然話係位於禁區之內，但沙頭角邨都有齊市鎮廣場、巴士總站、公共圖書館同埋各類商店。