之前阿史喺介紹日軍侵占香港嘅時候，就提過喺淺水灣一座名為余園（Eucliffe）嘅別墅入面發生過一場大屠殺，而事後呢座余園就經已拆卸。唔知史友們又知唔知，其實香港曾經係有三座嘅余園，其中一座位於大埔嘅余園仲相當巴閉添！

余園，其實就即係星馬地區中醫藥材大型企業「余仁生」第二代經營者余東旋喺香港建立嘅三座別墅，佢哋都統稱叫做「余園」，而差唔多類型嘅建築余東旋一共就喺星馬同埋香港建立咗十二棟。雖然佢哋中文名都係叫做余園，但英文名就座座都唔同，好似大埔余園就係叫做Sirmio。

大埔余園Sirmio係香港三座余園入面面積最大嘅一座，佔地足足有成693,025平方呎。位於汀角路三門仔對面，呢座余園建成果陣汀角路都仲未出現，所以出入都真係要搭船。Sirmio建樓高三層，建築風格上嚟講就係仿歌德式建築，入面有住唔少名家油畫同埋珍貴收藏品。

而講到最令人諗唔到嘅事，就係呢度曾經係有一個好大嘅動物園，既養咗唔少雀鳥、狗隻，就連孔雀、熊貓都曾經養過。雖然Sirmio位置偏僻，但其實係全港最安全嘅一個地方，事關呢度後山仲有起埋防空洞，入面仲儲足幾個月糧食，真係夠晒謹慎。

原圖嚟自網絡