首條行走雙層巴士嘅路線——九龍巴士1號線

隨住人口嘅增加、商業嘅發展，社會大眾對公共交通工具嘅需求同埋要求都愈來愈多，既要講舒適度又講求快捷。以前嘅雙層巴士係幾罕見，但今時今日要搵架單層巴士可仲難過搵雙層巴士，史友們又知唔知第一條行走雙層巴士嘅路線又係邊條呢？

如果史友們有返咁上下年紀，可能就會知道阿史想介紹嘅正正就係呢條九龍巴士1號線。呢條路線早喺1920年代就已經開辦，係成個九龍區最早開辦嘅巴士路線之一，早期係來往尖沙咀同埋九龍城，車內係會分成頭等同埋二等收費，但當時仲係用緊編號6號嘅單層巴士行駛。

如是者運行咗接近二十年，就算去到日本侵佔香港嘅三年零八個月（除咗守軍對抗日軍期間），呢條巴士路線都仲係以「1」號編號繼續運作，係極少數當時仲可以營運嘅巴士路線。而去到1946年，九巴就以1號線嘅名義重開呢條巴士路線，並且喺1949年4月1日派出四架雙層巴士行車,成為全港第一條可以提兵雙層巴士行走嘅路線。