上帝之手成永恆經典

球王馬勒當拿走咗，相關報道由尋晚到今日幾乎洗晒版。講到呢位傳奇球王，點可以唔提1986年世界盃嘅「上帝之手」。

响1986年墨西哥世界盃，由馬勒當拿帶領嘅阿根廷响八強賽對英格蘭。呢場比賽牙骹味十足，除咗因為兩隊都係強隊外，阿根廷同英國响八十年代初先打過仗，所以呢場比賽備受矚目。但場前相信無人會估到，呢場波會成為世界盃最經典賽事之一。比賽响下半場6分鐘，馬勒當拿於球門前接應高波個陣，舉高手臂將個波送咗入龍門。當時英格蘭球員同投訴呢個係手球，但球證就判咗呢個入波有效，就咁阿根廷領先一比零。至於呢個入球，就被稱為「上帝之手」。

隨後馬勒當拿一個人扭過五名英格蘭球員射成二比零。最後呢場比賽阿根廷以二比一淘汰英格蘭。當年同佢對陣嘅英格蘭射手連尼加响社交媒體發文致哀，指馬勒當拿絕對係佢個年代最強嘅球員，更可能係史上最強，仲希望馬勒當拿最終响上帝之手得到安息。