提起九龍城寨相信唔少史友都可能好有回憶，甚至可能仲曾經喺城寨入面生活過。喺1991年嘅今日，經過多次談判都仍有部分住戶未達成賠償共識之下，港府就採取強制收樓，展開第一期清拆九龍城寨嘅工程。

呢個曾經係世界上人口密度最高嘅地方，今時今日就已經改建成一個公園。九龍寨城嘅歷時其實相當悠久，係由1847年由清政府擴建而成，係當時新安縣內一個具有戰略價值嘅軍事駐地，而因為《展拓香港界址專條》，到咗1899年呢個地方就成為全香港唯一一個無政府狀態嘅圍城，又叫做外飛地，唔少罪惡都喺呢度發生。

去到1941至1945年，日軍就侵佔咗九龍城寨拆毀全部城牆，九龍城寨甚至一度成為露宿者聚居嘅地方。戰後，由於呢個地方「三不管」，即係「香港政府不敢管、英國政府不想管、中國政府不能管」，黃、賭、毒都喺呢度出現。雖然其後幾次港府都想派出警察剷除城寨內黑社會勢力，但幾乎都唔成功。

直到1984年12月，中英兩國簽訂《中英聯合聲明》之後，兩國都有個共識就係要處理好九龍城寨嘅問題，最後喺1987年共同決定拆掉城寨，並且喺1991年11月28日正式動工。

原圖嚟自網絡