全港最長行車道路——青山公路

繼續同史友們介紹一啲特別嘅基建，高樓同隧道就同史友們講過唔少，咁全港最長嘅公路史友們又知唔知係邊條呢？心水清嘅史友應該都會知名阿史想介紹嘅正正就係全港最長嘅行車道路，青山公路喇！

呢條新界區第二條落成嘅公路，全長有成52公里，早喺1911年就開始動工興建，歷時9年先喺1920年全線落成。咁點解冇啦啦要起呢段公路呢，真係講開有段故喇！喺1899年《展拓香港界址專條》落實之後，「新界」嘅軍事布防同埋土地發展都需要有交通基建先可以進行，其中就要連結新界同埋九龍。於是，喺大埔公路出現之後，青山公路亦都係第二條可以由九龍通往新界嘅公路。

於是，青山公路就喺深水埗桂林街交界處同大埔公路分歧開始，一路由長沙灣、荔枝角、葵涌、荃灣、深井、小欖、屯門、洪水橋、元朗等地方，最後連接到上水終結。由於呢條路真係太長，所以全程係分成22段，每個段都有唔同地區名。時至今日，呢條公路仲係來往新界全境嘅交通要道。