呢排網絡上又重新流傳一張相，相入面嘅人物可能後生啲嘅史友未必知道佢係邊個，但對老一輩嘅史友嚟講，曾昭科就係一個相當熟悉嘅名嚟，佢亦都係號稱「香港第一諜案」入面嘅主角。

咁呢件案件到底係關於咩呢？就要由曾昭科呢個人介紹先喇。曾昭科，又名曾約翰，1923年出生喺廣州，喺佢父親安排之下，佢就曾經入讀過九龍華仁，後來亦都留學過日本早稻田大學、京都帝國大學，稱得上係一個高材生。而喺二戰結束之後，佢就畢業返到香港，加入香港警隊。由此佢嘅學歷同埋才能，佢深受警隊重用，仲曾經被派到倫敦警察廳受訓，先後去過政治部、九龍刑事偵緝處副處長，精通精通英、日、粵、普嘅曾昭科去到1961年仲被升為助理警司，做過香港總督葛量洪保鏢，總之就相當多威水史啦！

咁佢同「香港第一諜案」有咩關係呢？原來喺1961年10月，當時警方就喺羅湖截獲一個右腿打上石膏嘅男子，喺佢身上就發現一啲同中方特務有關嘅底片，經政治部盤問之下就發現原來接頭人係時任警察訓練學校副校長曾昭科，呢個消息當時一流出真係震驚全港。去到10月6日，香港政府就宣佈曾昭科懷疑幫北京當局進行間諜活動，於是對佢展開扣查，喺58日之後未經審判就遞解出境，呢單就被稱為「香港第一諜案」。

最後，曾昭科就返到廣州定居，喺1978年暨南大學擔任外語系教授、系主任，其後亦都做過全國政協委員、全國人大代表。2014年12月18日，佢因病救治無效喺廣州逝世，終年91歲。

原圖嚟自網絡