每年十二月，阿史都會介紹抗戰同二戰相關嘅歷史，因為响當時其實太多重大事件發生，今日就講講南京保衛戰。

南京保衛戰係指日本大本營下達《大陸命令第八號》命令進攻中華民國首都南京，至日軍攻陷南京城為止，呢場戰役結束時間各方有唔同講法，不過可以肯定嘅就係南京淪陷。作為首都，當時國軍理應全力守護，不過响呢場保衛戰爆發之前，就有唔少國軍高級將領主張棄守。

蔣介石响日記就提及過，當時日本攻陷上海後，佢同一班高級將領就開過多次會議商討對策。因為上海失陷後，日軍下一個目標就一定300公里外嘅南京。當時响國軍班軍頭當中，主張棄守嘅呼聲甚眾，包括李宗仁、徐永昌、白崇禧、陳誠、張群等，連德國嘅軍事顧問都有咁嘅主張。原因係乜呢？首先就係經過上海一帶作戰之後，國軍失去大批精銳之師，撤至南京嘅部隊殘破，根本無力防守。另外，南京城同周邊地形易攻難守。鑑於呢啲原因，所以班軍頭都覺得不作無謂犧牲，日後可以爭取主動。

雖然一眾高級將領話主張棄守南京，但蔣介石就主張死守，參謀長何應欽同軍令部部長徐永昌話無意見。最後就係，唐生智自告奮勇死守南京，蔣介石覺得終於有人肯做呢件事。當然，結果同預期相差實在太遠，南京保衛戰開打兩星期唔夠南京就失陷。

原圖：網絡