提起早年嘅諜案，有一宗案件就真係不得不提，可能係唔少史友們都聽過嘅「克什米爾公主號」爆炸案，據講原定會乘搭包機嘅就有當時嘅總理周恩來。

咁到底呢件事嘅來龍去脈又係點呢？「克什米爾公主號」其實係印度航空一架洛克希德星座型民航機，喺1955年4月有唔少國家喺二戰之後都會去到印尼召開萬隆會議，當時中國就向印度航空租借「克什米爾公主號」作包機服務運送代表團成員。原定嘅乘搭包機者包括總理周恩來，係會由北京起飛經香港前往印尼雅加達，然後再往萬隆出席會議。

之不過，當時中國政府就收到匿名情報，指台北當局特工準備喺途中執行破壞行動，可能向包機放置炸彈。於是周恩來指示通知新華社香港分社，並由中華人民共和國外交部向英駐華代辦處交涉。去到最後，原定乘坐包機嘅代表團主要成員都冇上機，周恩來就臨時改變行程去到緬甸。

點知喺1955年4月11日，喺三方都知道呢次暗殺事件之後，印度航空就要求所有人員離機時不得攜帶行李包裹，原本以為咁樣就冇乜問題。但係，「克什米爾公主號」喺香港啟德機場停留70分鐘期間，就被一位啟德機場清潔工周駒將炸藥帶上飛機，飛機喺接近印尼海岸果陣爆炸，機上共有19人只有3名機員生還，其餘11名乘客及5名機組人員全部罹難。

事件發生後，中華人民共和國方面向港英政府提出照會，指責港府喺事先得到警報下仍未能夠保障飛機安全，要求嚴辦兇手。經過調查，最後放置炸彈嘅周駒於1955年5月18日返回台灣。

原圖嚟自網絡