早兩日阿史就同大家講到乾隆年間嘅一個傳奇人物十八世界嘅世界首富和珅,乾隆年間犀利嘅事又點止一件,中國現存規模最大叢書《四庫全書》亦都係喺乾隆年間編纂而成。

《四庫全書》,又叫做《欽定四庫全書》,係喺乾隆三十八年(1773年)開始編纂,歷時9年成書。當時朝廷係成立咗一個「四庫全書館」專門負責呢件事,並且仲派咗乾隆皇帝第六子永瑢負責、內閣大學士于敏中,大學士同埋六部尚書、侍郎都要幫手,而且仲召埋著名學者紀昀為總纂官,後來連陸錫熊、孫士毅、戴震、周永年等學者都相繼加入,陣容相當犀利。據估計,參與編撰並正式列名嘅文人學者達到三千六百多人,淨係抄寫人員都有三千八百人,可想而知乾隆皇帝係幾重視呢件事。

咁到底呢部《四庫全書》係講啲咩呢?所謂「四庫」,其實係指經、史、子、集四部,為便於識別,四部採用分色裝幀,經部綠色,史部紅色,子部月白色,集部灰黑色。四部下再細分44類,包括《論語》、《大學》、《孟子》、《中庸》、《周易》、《周禮》、《禮記》、《詩經》、《孝經》、《尚書》、《春秋》、《爾雅》、《説文解字》、《史記》、《水經注》、《戰國策》、《本草綱目》等經典著作,仲有加入到日本、朝鮮、越南、印度以及歐洲人著作,內容相當廣泛。

原圖嚟自網絡