中國歷史上最短壽嘅皇帝——漢殤帝劉隆

早兩日阿史就同大家介紹咗首創年號嘅皇帝漢武帝劉徹，同時佢亦都係在位時間、壽命都好長嘅一位君主，咁介紹完最長自然就會講埋比較短壽嘅皇帝，今次阿史就想講一講漢殤帝劉隆。

劉隆出生喺105年10月，係漢和帝幼子，亦都係東漢第五位皇帝。佢唔單止短壽，佢更加係即位年齡最小嘅一位中國皇帝。喺佢父親漢和帝在生嘅時候，本身都好多皇子，但佢哋都離奇喺官中夭折，當時漢和帝就覺得應該係宦官、外戚喺度謀害佢啲子女，於是就將倖存嘅皇子都送到民間養育。

去到元興元年乙巳年十二月廿二日（106年2月13日），漢和帝就過身，當時長子劉勝就被鄧皇后指身懷絕症，於是只好由劉隆返到皇宮做皇帝，直到劉隆登基果陣，佢都只係得百幾日大，所以佢就被稱為「百日皇帝」。雖然話就話係皇帝，但朝政都係由外戚鄧騭掌權。