【講開有段故】中國收錄漢字最多一部大字典——《康熙字典》

中、英文字典相信都係大家讀書時必備嘅字典，阿史好細過就聽到有本叫做《康熙字典》嘅字典，係世上第一本以「字典」命名嘅字書，到底呢本字典入面又係介紹啲咩內容呢？今次阿史就同大家講一講啦！

《康熙字典》係一本喺清朝康熙五十五年（1716年）成書嘅漢字字典，呢本字典係由文華殿大學士兼戶部尚書張玉書及經筵講官、文淵閣大學士兼吏部尚書陳廷敬擔任主編，期間仲有史夔、吳世燾、萬經等等二十八人任纂修官。當中就參考咗明代兩本重要嘅書籍，分別係《字彙》、《正字通》歷時六年編纂完成，時至今日都仍然受到廣泛運用。

咁呢本字典又記錄咗啲乜呢？原來就係記錄咗當時嘅漢字點畫寫法，由音讀去到義訓都有詳細記錄，係自漢代《說文解字》以嚟嘅另一部字典大作。《康熙字典》一共就有47,035字目，按地支分成十二集，每集又有上中下卷，入面又會列咗《廣韻》、《集韻》、《韻會》等韻書音切；並以《尚書》、《孟子》、《莊子》等經、史、子、集之書為證，內容相當嚴謹全面。

原圖嚟自網絡