繼續同史友們介紹一啲香港特色嘅地名，今次就想同史友介紹下「沙田」呢個地名嘅由來，到底點解以前嘅「瀝源」後來會被叫做「沙田」呢？

咁喺古代，沙田呢塊土地其實係一塊遍佈荊棘嘅荒蕪園地，所以早期又叫做「棘園」。後來就因為居民喺城門河兩邊聚居，上下游嘅河水相當清澈，所以又有瀝源呢個叫法。

咁沙田又係點嚟呢？原來喺地理上嚟講，「瀝源」係一個長年經過泥沙沉積，三面環山嘅地方，由於相當適合耕種，所以中間一塊谷地就被稱為「沙田谷」，後來又有「沙田圍」及「沙田頭」兩條村落出現。

至於點解「瀝源」又會被叫做「沙田」，咁就係一個大誤會喇。其中一個講法就係話，中英簽訂北京條約之後，港府就隨即派人勘察及接收新界各個地方，當時就有一個政府職員行到「沙田圍」並向居民問到地名，當時居民就回覆係沙田，但點知呢位職員就誤以為成個區域都係沙田，就係咁將「瀝源」、「沙田」兩個地名搞錯咗喇！

原圖嚟自網絡