回歸前香港有「太空人」？

近日有傳媒指，話英國個邊有一個新計劃，就係之前公佈嘅BNO留英計劃會响下月底起接受申請，而消息就話呢個計劃擬放寬容許「太空人」模式，即係容許父母其中一人留港繼續工作，另一人就帶同子女到英國。睇到呢單新聞，阿史就諗起回歸前香港都出現咗一批「太空人」。

响香港落實1997年回歸祖國後，部分香港人（主要係有錢人同專業人士）因為擔心前途問題，於是就申請移民他國，其中英國、加拿大、澳洲就係最熱門嘅地方。之但係，去到新地方好多時都要由頭嚟過，以往响香港搵開錢去到可以要由低做起。結果就出現一個現象，就係老公返嚟香港做嘢搵錢，老婆仔女就响個邊，呢批人就叫做「太空人」喇！

點解叫「太空人」呢？其實有兩個意思，第一個意思就係老公成日因工作同家庭，要成日坐飛機飛嚟飛去，好似太空人咁成日响空中。另一個意思就比較抵死，就係「太太位置空了的人」。因為夫妻分隔異地，老婆唔响身邊，梗係「太空人」啦！而當時呢種「太空人」模式的確引發好多家庭問題，無論係移民難以適應新環境，抑或家庭成員關係變差。