早排都同史友們分別介紹完「兩彈一星」嘅歷史同故事，而今日就係被稱為「中國導彈之父」錢學森嘅誕辰，咁阿史今次就同大家介紹下呢位傳奇人物啦！

錢學森出生喺1911年嘅上海，幼年都喺北京讀書，1929年就考入國立交通大學機械工程系鐵路門,畢業之後仲成為20位留美公費生之一，當時佢喺老師王士倬指導下，決定去到麻省理工學院進修空氣動力學。

就係咁，佢喺1935年就到美國西雅圖讀書，並且後來仲去到加州理工學院同空氣動力學權威西奧多·馮·卡門教授多次合作，碩士、博士課程佢都讀埋，亦都加入加州理工學院火箭研製組，研究火箭固體燃料、結構屈曲等課題，後來仲做埋加州理工學院副教授、入過美國空軍顧問小組，成就真係不得了！

之但係，時間去到1949年，佢就因為入籍被拒，再加上冷戰等因素，被美國禁止參加機密工作同時又阻止佢返到中國，司法部仲曾經做出「偽證」罪吊銷佢機密工作許可、臨時拘留喺特米諾島監獄並將佢驅逐出境。

有過呢段經歷之後，中國政府1955年就展開日內瓦雙邊會談，以韓戰中被俘11名美國機師換取釋放錢學森。錢學森返到中國之後，參觀過多個北京、東北科學研究所，最後喺哈爾濱軍事工程學院同陳賡對談之後，決心為中國研製飛彈。就連後來馮·卡門都表示錢學森係「美國火箭領域中最偉大的天才之一，我的傑出學生。」

原圖嚟自網絡