離奇古怪嘅故事歷朝歷代都流傳唔少，但喺明朝就有一場大爆炸，後世估計當中嘅威力相當於廣島原爆，咁到底呢場大爆炸有咩咁離奇呢？阿史今次就同大家介紹下啦！

喺唔少歷史書籍入面，都有記載呢場王恭廠大爆炸，又或者叫做天啟大爆炸。要介紹呢件事，就要先從王恭廠講起。呢個地方係工部專門用嚟生產盔甲、銃炮、弓矢、火藥嘅兵工廠，亦都係一個火藥儲存庫，入面常年都有70、80人駐守，供應咗京營火藥所需嘅火藥，而佢嘅位置大概就係喺西城區永寧胡同與光彩胡同一帶。

時間去到明朝天啟六年五月初六，喺端午節第二日嘅巳時，據記載提到當時係「天色皎潔，忽有聲如吼，從東北方漸至京城西南角，灰氣湧起，屋宇動盪」，然後就天色昏黑如夜，並且有啲靈芝狀煙雲衝天，喺王恭廠周邊區域發生一連串離奇爆炸，爆炸半徑範圍足足達到750公尺，面積達1.77平方公里，有成2萬幾人傷亡。

本身火藥廠爆炸都唔係咩出奇事，之但係呢次爆炸嘅威力就唔係當時火藥可以造成，而且爆炸區域入面嘅死傷者所有衣著都離奇唔見晒，再加上爆炸成因未明，令到呢件事又多幾分離奇色彩。

原圖嚟自網絡