以北京四合院概念設計嘅赤柱市政大樓

提起市區嘅市政大樓，相信史友們都會即時諗到一式一樣嘅建築物，雖然話集運動場、圖書館以及社區會堂等功能於一身，但只係講建築外形嘅話都真係冇乜特色。假如阿史同大家講，原來香港係有一個市政大樓係根據四合院嚟設計嘅，史友們又估唔估到係邊個呢？

冇錯喇，阿史就係講緊位於赤柱嘅呢一座市政大樓。呢座大樓位於赤柱市場道6號，喺2006年5月18日啟用，樓高四層佔地就達到2,800平方米，一共用咗 1.7億港元興建。呢座大樓入面有住好齊全嘅設計，就好似赤柱體育館、赤柱社區會堂、赤柱公共圖書館等等，而最難得嘅就係呢度其實仲設有中央庭院，所以喺大樓建成嘅同年，呢個設計亦都得到香港建築師學會頒發全年建築大獎。

咁到底呢座建築物同四合院有咩關係呢？原來呢個項目嘅建築師師溫灼均當時就諗，赤柱本身就有住自然嘅景色，大樓更加會係依山而建，到底點樣可以令人有種自然簡潔嘅感覺而又可以帶出鄉村風味呢？佢當時靈機一觸就諗到參考四合院嘅設計，再加以改良用清水混凝土、玻璃地台、青綠竹樹等最簡潔嘅方式帶出大自然嘅氣息。