「兩彈一星」嘅「東方紅一號」

尋日就同史友們介紹到中國導彈之父錢學森，而近排嘅嫦娥五號同埋長征十一號運載火箭亦都引起咗大家嘅航空熱，咁阿史就想同大家介紹埋「兩彈一星」嘅「東方紅一號」。

「東方紅一號」同中國1964年第一顆原子彈、1966年第一顆裝載核彈頭飛彈、1967年第一顆氫彈並稱為「兩彈一星」，同時亦都係中國喺1970年4月24日喺酒泉衛星發射中心發射升空嘅人造衛星。

講起呢個人造衛星，就要喺1965年講起，呢個計劃亦都係同當時國防部五院副院長錢學森有關。當年正正就係錢學森向國防科委提出制定中國人造衛星研究計劃，並且得到周恩來重視，於是正式展開「651工程」。「東方紅一號」由以錢學森為首任院長嘅中國空間技術研究院研製，其實一共就製造咗5粒樣星，但結果就喺1970年4月24日21時35分，「長征一號」運載火箭載著「東方紅一號」衛星，第一粒衛星就發射成功。