好耐之前阿史介紹維多利亞城界石個陣,就提及過馬己仙峽道15號界石就喺2007年被移除。阿史細個個陣一直覺得馬己仙峽道呢個名好得意,睇返個英文地名,先發現呢個名係叫Magazine Gap Road,直譯就係馬己仙峽道喇!咁呢個地方係咪同雜誌有關呢?

原來係阿史英文水平太差,Magazine除咗係雜誌,仲係指軍火庫。從十九世紀個陣開始,呢條路就係香港半山區及山頂嘅主要道路。咁又關軍火庫乜事呢?就係以往英軍响金鐘一帶設立陸軍軍營同海軍基地,而响依家嘅正義道,以往就係軍火庫所在地,所以軍火庫對上個山谷就稱為Magazine Gap,即係馬己仙峽,响馬己仙峽嘅主要道路就叫做馬己仙峽道喇!而呢個軍火庫,就係亞洲協會香港中心依家嘅所在地。

原圖:網絡