响1937年12月日軍攻陷南京後，進行六星期嘅大屠殺。早前阿史都提及過，當時响南京就有一班外國人留响南京，庇護同救助城中嘅中國人，更有人冒住生命危險，以影片同相片記錄低日軍响南京城滅絕人性嘅惡行，其中一人就係辛德貝格。

辛德貝格係一名丹麥人，响1937年12月至1938年3月，當時只得26歲嘅佢就响南京江南水泥廠工作。呢間水泥廠由於同德國及丹麥嘅公司有合作，所以响日軍侵華時就响佢哋派員嚟保護間水泥廠，而辛德貝格就係丹麥FL史密斯公司派嚟嘅保安職員，而德國禪臣洋行就搵咗卡爾·京特博士去幫手。佢哋去到南京，就响德國駐華大使館出咗份官方文件，證明企業同德國公司有關。另外辛德貝格就搵人縫咗丹麥旗同「納粹德國」掛响水泥廠度，等日軍見到就知道係德國同丹麥企業。而呢個水泥廠係响南京城外，當時就有唔少中國人走難到呢度，江南水泥廠亦成為當時南京淪陷後一個難民營。據估計當時水泥廠直接或間接照顧過嘅中國人超過一萬人。

為咗救助响水泥廠嘅中國人，辛德貝格就冒險進入南京城嘅國際安全區尋求其他外國人幫忙，而响拉貝嘅日記中亦有提及過辛德貝格帶咗啲糧食俾安全區內嘅人。不過，响日方施壓之下，辛德貝格就响1938年3月被迫離開水泥廠，FL史密斯公司派出另一名丹麥人接替嘅辛德貝格嘅工作。

對於辛德貝格响日軍攻陷南京後保護中國人，唔少人就尊稱佢為「南京的丹麥英雄」。

原圖：網絡