對於中國歷史上最長壽嘅人,唔知史友們又有冇咩概念呢?傳聞喺四川省綦江縣,就曾經出過一位壽命接近成二百幾歲嘅老人,佢亦都被認為係中國歷史上最長壽嘅人,今次阿史就同大家介紹下李清雲啦!

關於李清雲呢個人嘅壽命,一直以嚟都係講唔清,事關淨係佢嘅出生日期就已經有好多唔同嘅講法。就好似有講法話佢係西漢時期嘅人,又有講法指佢係明弘治十年(1497年)出世,而據講佢就曾經表示自己出生喺1736年(清乾隆元年),亦即係在世197年。

據書籍記載,佢既係一位中草藥家,又係一位氣功大師,仲曾經喺民國時期做過戰術顧問。佢嘅長壽成為一時佳話,曾經喺1928年就出過一本書《長生不老訣》講述長壽關鍵,甚至令到美國《時代雜誌》(TIME)喺1933年都報導過,當時就有一篇名為《龜雀狗》(Tortoise-Pigeon-Dog)嘅文章,當中就提到佢留畀後世人長壽嘅秘訣,正正就係「保持一種平靜的心態,坐如龜,行如雀,睡如狗」。而喺《時代》雜誌同埋《紐約時報》,都共同指出呢位長壽老人有成256歲命,一生娶過24位老婆,有180個子女,至於係真係假,至今都仍然無法證實。

原圖嚟自網絡