晉國君主晉景公 竟然跌入糞坑溺死？

講起中國古代嘅帝皇，最長壽、最短命又或者在位時間最長嘅帝王，阿史都同大家介紹過，之但係，歷史上竟然係有位帝王死因係跌入糞坑溺死，真係估都估唔到啊！

阿史今次想介紹嘅正正就係晉國君主晉景公。呢位春秋時期嘅君主，係晉文公個孫，喺前599年繼位，去到前581年去世。喺佢在位期間，晉國曾經打敗齊國，但又被楚國打敗，楚莊王都因為咁而成為一時嘅霸主。喺晉景公嘅晚年，佢就因為趙氏勢力威脅晉公室而遷都新絳。

喺新絳嘅時候，亦都係佢聯吳制楚嘅時候，由於疲於奔命就咁病埋。當時佢發咗個惡夢，醒嚟嘅時候就問巫師點解，巫師就話佢情況好差，應該食唔到新麥，後來亦都有秦桓公派嚟嘅醫師幫佢診治，醫師都直言佢病得好嚴重。醫師走咗之後，晉景公就叫人拎啲新麥畀佢食，順手殺埋果個預言佢食唔到新麥嘅巫師。結果，晉景公食新麥之前就突然肚痛，不幸喺去茅廁嘅時候跌入糞坑溺死。