李鄭屋古墓入面 「大吉番禺」有咩意思？

早排阿史睇電視果陣，就睇到大台有輯節目邀請咗唔少歷史學者講解香港嘅古蹟同埋文物，當中唔少集數都幾有意思，其中就有一集係講到李鄭屋古墓入面嘅「大吉番禺」。

李鄭屋古墓現時就係香港歷史博物館嘅五間分館之一，當中李鄭古墓嘅部分就已經被列為法定古蹟。提起呢個古墓，就要由1955年8月講起，當時港府為咗解決市民對公共房屋嘅需求，就選址喺當時嘅李鄭屋村興建徙置大廈。但點知建築工人喺動工嘅時候，無意之中就發現到一個古墓，後來經過中大教授林仰山同埋一眾師生努力之下，成功對李鄭屋古墓進行發掘，並且為呢個古墓加設咗一啲維護嘅設施。

喺香港可以發現到一個東漢時期嘅古墓當然係好難得，而之所以可以喺無任何骸骨情況之下斷定到古墓，就全賴墓入面嘅陶屋模型和各種陶器及青銅器等，都同珠三角地區東漢時期嘅墓穴極為相似。更加犀利嘅係，墓室嘅磚塊有唔同花紋以及文字，當中就有「大吉番禺」、「番禺大治曆」等。「大吉番禺」呢個字眼相當有意思，除咗係寓意祝福番禺縣大吉大利、長治久安，亦都印證到無論係秦朝定係漢朝，香港呢個地方都係屬於南海郡番禺縣。