中英兩國簽署《中英聯合聲明》

喺1984年嘅今日，對中國、英國、甚至係香港呢片土地嚟講，都係好歷史性嘅一日，事關呢一日正正就係中國同埋英國正式喺北京簽署《中英聯合聲明》，亦都意味住喺1997年7月1日中國會對香港重新恢復行使主權。

呢份《中英聯合聲明》早喺中國開始進行經濟改革開放之後，雙方就為咗處理香港嘅前途問題而進行歷時兩年嘅商討。成場嘅談判可以分成兩個階段，第一階段就係秘密磋商，由當時英國首相戴卓爾夫人喺1982年9月到1983年6月間，就原則、主權歸屬、駐軍同埋程序問題進行過幾次商討；至於第二階段就係正式嘅會談，就係喺1983年7月到1984年9月間展開，呢個階段嘅會討就係對香港未來實行嘅制度、過渡時期嘅安排展開實際嘅會談，亦都係喺呢個階段中方表現出強硬嘅態度，當時鄧小平更加直言「主權問題是不能夠談判的」。

最後，中英雙方就達成共識，喺「一國兩制」、「港人治港」嘅構想之下，喺1984年12月19日由時任國務院總理趙紫陽同埋英國首相戴卓爾夫人作為兩國政府代表喺北京簽訂《中英聯合聲明》，歷時12年嘅香港過渡時期亦都正式展開。