由灰窰遺址及民居改建而成——上窰民俗文物館

早兩日就同史友們介紹咗全港最大型嘅博物館之一嘅沙田博物館，唔少史友都大讚呢間博物館多野睇，仲有史友想阿史再介紹其他有特色嘅博物館，咁就當然冇問題啦，今次阿史就同大家講一下一個由灰窰遺址及民居改建而成嘅上窰民俗文物館。

上窰民俗文物館位處西貢郊野公園之內嘅北潭涌風景區自然教育徑，原身係一座十九世紀末建成嘅客家村舍，亦都係以燒窰而聞名嘅上窰村。呢條村落由原藉廣東省寶安縣嘅黃姓客家族人所建，如果有史友行過路過應該都會留意到，成座房屋都係建立喺一個高出地面嘅平台上，而且入口亦都相當奇怪，設立喺一個塔樓底下，呢啲設計都係因為臨近海邊同埋防禦海盜而特意諗出嚟。

現時改建成博物館嘅上窰村內，一共就有八間房屋，屋前亦都有曬坪、耕種工具及農村傢具，屋內就設有更樓、豬舍、牛欄，完全就係當年嘅鄉村風貌。至於鄰近位置亦都有一座被列為法定古蹟嘅灰窰，就係當年村民燒石灰嘅場所。呢個行業曾經興盛一時，但後來英泥同埋造磚等建材出現之後，窰燒工業於20世紀初沒落，上窰村亦都荒廢。