對唔少住喺新界西嘅朋友嚟講,喺未有西鐵之前,每日要通勤出到九龍返工都真係一件好折磨人嘅事,之但係喺2003年嘅今日,就有一條鐵路嘅出現令到呢件事有所改變,呢條就係西鐵線喇!

喺2003年12月20日,九廣鐵路公司西鐵正式通車,正式將新界西同埋九龍西以鐵路嘅形式連接。關於呢個構想,其實早喺1905年9月果陣喺立法局嘅定線方案入面就有提出過,其中一個方案就係打算由尖沙咀向西北行,經過荃灣同埋青山沿岸,最後去到元朗一帶,但由於呢個方案造價太貴,當時港府就用咗現時東鐵線嘅方案。而去到1980年代,當時因應屯門新市鎮、元朗新市鎮嘅發展,社會上就再次提起應唔應該興建一條連接新界西北去到市區嘅鐵路。

當年因為建築困難、成本問題以及兩鐵競爭等等嘅因素,令到輕鐵通埋車都仲未起到西鐵,結果要去到1996年年尾,西鐵興建權先批畀九鐵公司,經過一輪走線重組同埋財務安排,耗資464億港元興建嘅屯門站至南昌站鐵路路段就喺2003年12月20日正式通車。

原圖嚟自網絡