「送王船」被列入非遺名錄？

早兩日阿史就講到中國太極拳經歷十二年嘅申遺之路，終於都申遺成功，而唔知史友們又有冇留意到，喺今次嘅申遺成功嘅名錄入面，其實仲有一項由中國、馬來西亞聯合申報嘅非遺，阿史所講嘅正正就係「送王船」喇！

「送王船」可能對大家嚟講係一樣比較陌生嘅習俗，但其實喺中國閩南、馬來西亞、甚至係台灣一帶都有機會見到。呢個發源喺閩南廈門、泉州嘅慶典，大約喺15至17世紀形成，當中嘅意義係希望通過拜祭海神、悼念海上遇難嘅人，繼而祈求海上平安、風調雨順，而呢個習俗亦都因為華人下南洋而被傳到去馬來西亞。

呢個傳統習俗都被雙方視為係共同嘅非物質文化遺產，而喺馬來西亞嘅馬六甲，仲保留住相當完整嘅「送王船」史料。「送王船」形式上就係一眾嘅漁民喺海邊聚集，歡迎王爺到廟宇並且同時豎起燈柱召喚海中嘅亡魂，係有一個「行善」嘅意義喺度。聯合國教科文組織就表示，呢個儀式可以喚起祖先遠洋航行嘅歷史記憶，仲可以表現到人同海洋之間嘅和諧，見證住唔同社區之間嘅跨文化對話。