「藥聖」李時珍獲選年度國史人物？

話說早排阿史就睇到一個好有意思嘅選舉，就係「中國歷史人物選舉」，呢個選舉可以畀參加嘅學生同埋公眾人士根據「科教興國，經世濟民」呢個主題，喺五位都係科學專材嘅侯選古人入面，選出佢哋心目中嘅年度國史人物。今年大大小小嘅事都受到疫情影響，連呢個選舉都唔例外！

近排負責舉辦呢個選舉嘅機構就公佈咗選舉嘅結果，喺五萬四千幾票當中，其中一位侯選人，明朝嘅「藥聖」李時珍就以三萬二千幾票排喺首位！李時珍生於明武宗正德十三年，年幼嘅時候就考取咗秀才，但可惜一直都冇辦法成為舉人，於是只好醉心喺醫學之上。佢曾經同佢父親表示，自己決心棄儒從醫，「身如逆流船，心比鐵石堅。望父全兒志，至死不怕難」

喺佢30歲嘅時候，其實佢就已經成為咗家鄉嘅名醫，先後去過王府同埋官中嘅太醫院掌管良醫所事務，但做咗冇幾耐就辭官，返到雨湖北岸構築新居，題名「紅花園」。其後嘅30幾年，佢就用盡自己一生研究醫藥、走遍深山曠野並且親身試藥，著成一本對後世醫學有好重要影響嘅書。呢本就係《本草綱目》，令到後世有一本完整嘅書籍可以了解藥物形狀、生長狀況、藥性等等，真係功德無量！