早兩日就同史友們介紹完西鐵線嘅開通,講完西鐵線就當然要介紹埋另一條好有特色嘅鐵路,呢條鐵路仲畀馬鞍山一帶嘅居民戲稱為「街坊鐵路」,到底當中有咩原因呢?

馬鞍山綫現時就已經被合併入到屯馬綫一期,呢條負責連接沙田區同埋大圍站嘅鐵路,係以啡色線作為代表,最初嘅一段早喺2004年12月21日就已經開始營運,而其餘去到顯徑站、鑽石山站及啟德站嘅部分,就係去到2020年2月14日先開始加入嚟,而成條鐵路亦都喺呢個時候改名叫做「屯馬綫一期」。

馬鞍山綫嘅構想早喺1980年就已經出現,當年政府係為咗配合馬鞍山新市鎮發展,曾經喺一條報告入面設計咗多個計劃,例如就有輕鐵、重鐵以及高架鐵路等等,但歷年嚟就因為定線、造價等等嘅問題而未能成事,最後去到2001年2月12日先正式動工興建。

言歸正傳,點解呢個當年耗資約100億元興建嘅馬鞍山綫會被叫做「街坊鐵路」呢?原來喺馬鐵沿線,唔少站半公里範圍入面都有多個公共屋邨及私人屋苑,一共有幾十萬居民居住,於是就畀人叫做「街坊鐵路」喇!

原圖嚟自網絡