最近阿史聽咗一個網上節目，節目講者之一就係屈穎妍，至於佢講嘅話題就係以往港英政府年代洋人點樣歧視華人，佢同另一主持仲以《山頂區保留條例》為例子。其實，响呢條條例出現之前，香港已經有類似嘅條例，用以保護在港洋人嘅生活環境，講白啲就係洋人响香港嘅特權。

呢條條例就係《歐洲人住宅區保留條例》(European Reservation scheme)，明確規定華人唔准涉足歐式風格社區同建築場所。條例之所以出現，同香港華洋雜處所產生嘅矛盾有關。响十九世紀，原本中區一帶係洋人活動嘅區域，而華人就大多集中响港島西部。但隨著小部分華人愈嚟愈有錢，仲開始買中環周邊一帶啲樓居住。但响洋人眼中，華人唔單止文化生活習慣等同洋人差異好大，而且衛生情況都好差。所以，响1888年政府就通過《歐洲人住宅區保留條例》，禁止華人响太平山788呎以上興建房屋同居住，規定若干地段包括堅道至威靈頓街之間只能興建西式洋房。

後嚟有人就話，呢個擺明係洋人歧視華人嘅政策，但又有人話呢個係當時政府基於衛生考慮而推出嘅措施。但就咁睇，擺明係當時洋人嫌華人唔衛生啦！仲唔係歧視？

原圖嚟自網絡