平安夜係點嚟？

今日又係一年一度嘅平安夜，雖然因為疫情關係今年都唔會有乜慶祝活動，但最緊要平安，喺度阿史都祝大家聖誕快樂先！咁既然係平安夜，當然都要同史友們講下呢個節日係點嚟啦！

平安夜，其實又叫做聖誕夜，今時今日係一個世界各地都會慶祝嘅節日，但以前就係基督教社會嘅主要節日嚟。對比較傳統嘅教會嚟講，只要平安夜一到，就已經當做係聖誕開始，仲會喺當日早上進行守夜聚會，唔少嘅基督教教徒都會喺平安夜參與子夜彌撒或聚會，咁到底呢個節日又係點嚟呢？

根據《聖經》記載，呢一夜其實就係耶穌誕生嘅晚上，原本喺曠野看守羊群嘅牧羊人突然聽到天上嘅聲音話畀佢哋聽，耶穌降生嘅消息，佢會嚟到人間成為人世間嘅王，於是天使就希望牧羊人可以廣傳呢個消息。自此之後，世人就開始模仿天使，每逢喺呢個平安夜嘅晚上，就會到處宣揚耶穌降生嘅消息，時至今日，呢個傳統就慢慢演變成報佳音喇。而按照基督教傳統，每個家庭都要喺屋企擺放聖誕樹，當晚全家人仲會喺客廳一齊唱歌交換禮物，分享對來年嘅期望。