港督楊慕琦向日軍投降 香港展開3年零8個月日佔時期

過去兩個星期，阿史都同史友們講咗香港保衛戰之中唔少嘅故事，而呢場傷亡慘重嘅戰爭去到1941年嘅今日就正式告終，港督楊慕琦向日軍投降，喺半島酒店簽署同意無條件投降嘅降書，自此香港正式淪陷，呢一日又被稱為「黑色聖誕節」。

其實自從日軍攻佔咗新界同埋九龍之後，12月13日就曾經派出過勸降使團到香港島，希望可以不費一兵一卒拿下港島，但當時楊慕琦決定拒降。日軍隨即就大肆炮轟及空襲香港島,並且喺12月17日再次勸降，但楊慕琦依然拒絕。直到12月18日，日軍趁住濃煙阻礙英軍觀察，分別喺北角、太古船塢及愛秩序灣登陸香港島，喺港島各處同守軍展開激戰，邱吉爾仲發出電報要求守軍「不要有任何投降的設想」。

之但係，當時守軍已經難以扭轉劣勢，只能邊戰邊退，直到12月25日聖誕節，楊慕琦發表聖誕文告之後嘅下午，就表示守軍敗局已定，英軍前線開始掛出白旗，日軍同意停火，楊慕琦等人乘搭天星小輪橫渡維多利亞港到九龍尖沙咀，向指揮侵港日軍的酒井隆中將正式投降並舉行投降儀式。