長洲有個洋人專區？

上次講過响十九世紀港英政府就訂立《歐籍區保留條例》，之後訂立《山頂區保留條例》，即係將一啲地區劃成洋人專用居住區。呢啲咁帶歧視性嘅條例，原來連離島長洲都有。

响1919年，當時立法局就通過《長洲（居所）條例》，規訂長洲南邊作為洋人教會靈修同居住度假之用，即係唔俾華人响呢個地區居住。為咗呢件事，政府仲豎立15座界石，等長洲華人居民醒水。呢個規定其實就係華洋分隔，同《山頂區保留條例》分別不大。

咁呢條條例响幾時無咗呢？就係1946年。二戰後港英政府對呢類帶歧視性嘅條例作出調整，所以《長洲（居所）條例》就廢除咗喇。