短槍隊「圍魏救趙」襲啟德

响香港淪陷期間，出現唔少抗日游擊勢力，史友們自然對東江縱隊港九獨立大隊呢個名字相當熟悉。當時呢啲游擊力量唔單止令日軍好頭痛，仲响一定程度上對日軍造成打擊，就好似沙田短槍隊偷襲啟德機場事件。

响1944年初，黃冠芳、劉黑仔麾下嘅沙田短槍隊响某個夜晚突襲啟德機場，用計時炸彈將啟德機場內一架日本戰機同軍用儲油庫炸毀。突襲成功後，日軍方面大為緊張，於是將原本响沙田同西貢執行緊任務嘅兵力調返去市區，以免類似事件再發生。

其實呢次短槍隊突襲啟德，背後有一個目的。當時美國空軍嘅克爾中尉响執飛期間戰機被日軍擊落，後嚟克爾中尉被東江縱隊嘅小鬼隊成員救咗。日軍得知消息後就派兵到沙田同西貢捉佢，因此港九獨立大隊就決定嚟招「圍魏救趙」，通過夜襲啟德嚟轉移日軍視線，行動亦令日軍兵力調返去市區，幾經轉折克爾中尉成功離開香港。